20.oktober 2001 UKA 2001/26
Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuut
pillugu
Inatsisartut Isumaginninnermut Suliffeqarnermullu Ataatsimiititaliaata
ISUMALIUTISSIISSUTAA
allannguutissatut siunnersuutip aappassaaneerneqarnerani saqqummiunneqartoq
Inatsisartut Isumaginninnermut Suliffeqarnermullu Ataatsimiititaliaat suliarinninnermini ukuninnga inuttaqarpoq:
Inatsisartuni ilaasortaq Asii Chemnitz Narup, Inuit Ataqatigiit, siulittaasoq
Inatsisartuni ilaasortaq Ruth Heilmann, Siumut, siulittaasup tullia
Inatsisartuni ilaasortaq Vittus Mikaelsen, Siumut, Ruth Heilmannimut sinniisussaq
Inatsisartuni ilaasortaq Mikael Petersen, Siumut
Inatsisartuni ilaasortaq Jakob Sivertsen, Atassut
Inatsisartuni ilaasortaq Loritha Henriksen, Kattusseqatigiit
Inatsisartut Isumaginninnermut Suliffeqarnermullu Ataatsimiititaliaata UKA 2001-imi Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuut siullermeerneqarnerata kingorna oqaaseqaatitai ilanngullugit oqaluuseraa.
Tusarniaanermit akissutisiat
Siunnersuut teknikimut aningaasaqarnermullu tunngasuummat siunnersuut allanut pinnani taamaallaat Aningaasaqarnermut Pisortaqarfimmut tusarniaassutigineqarsimavoq.
Siunnersuutip imarisai
Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuut saqqummiunneqarpoq KANUKOKA-p aamma Namminersornerullutik Oqartussat, 2002-mi kommuninut ataatsimoortumik tapiissuteqarnissamut isumaqatigiissuteqarnerisa kingunerisaatut. Isumaqatigiissutip kingunerisussaavaa ineqarnermut tapiissuteqarnermut aningaasartuutit 60 %-iisa Landskarsimiit akilerneqarnissaat, ineqarnermulli tapiissuteqarnermut aningaasartuutit 40 %-ii kommuninit ulloq 1. januar 2002-mi allannguutissatut siunnersuutip atuutilerfissaanit akilerneqartussaallutik.
Tamanna Inissiani attartortittakkani ineqarnermut tapiissutit pillugit Inatsisartut peqqussutaata, Inatsisartuni UPA 2001-imi akuersissutigineqartup, allanngortinneqarnissaanut tunngaviuvoq.
Ataatsimiititaliami amerlanerussuteqartut, tassaasut, Inuit Ataqatigiit, Siumut, kiisalu Kattusseqatigiit, siunnersuut saqqummiunneqartoq taperserpaat.
Ataatsimiititaliami ikinnerussuteqartoq, Atassutip ilaasortaatitaa, oqarumavoq ineqarnermut tapiissutit aningaasartaat peqqussutissatut siunnersuutip akuersissutigineqarneranut peqatigitillugit akuersissutigineqartussaasut. Tamannali inissianik attartortut inissiamut akiliutaasa qaffanneqarnerannik kinguneqartussaammat, peqqussutissatut siunnersuutip naammassillugu suliarineqarnissaata kinguartinneqarnissaa ATASSUT-ip aalajangiusimagaa
Inatsisartut Isumaginninnermut Suliffeqarnermullu Ataatsimiititaliaata taamatut oqaaseqarluni Inissiani attartortittakkani ineqarnermut tapiissutit pillugit Inatsisartut peqqussutaata allannguuteqarneranik Inatsisartut peqqussutissaattut siunnersuut aappassaaneerneqarnissaanut ingerlateqqippaa.
Asii Chemnitz Narup,
siulittaasoq
Vittus Mikaelsen Mikael Petersen
Jakob Sivertsen Loritha Henriksen